Dr.Freylittle

Allt gott að frétta af mér. Er í verklegum æfingum á smádýraspítalanum í þessari viku og það er mjög spennandi. Fæ reyndar ekki að gera mikið annað en að fylgjast með, en það er svo sem lærdómsríkt.

Það var allt rafmagnslaust á Sjálandi í gær, og reyndar líka í hluta Svíþjóðar. Ég get nú ekki sagt að það hafi haft mikil áhrif á mig. Ég var að horfa á sjónvarpið meðan ég borðaði hádegismatinn þegar það slokknaði skyndilega. Ég furðaði mig svolítið á þessu en lagðist svo bara í sófann og fékk mér smá lúr með Míó. Ég vaknaði við að síminn hringdi. Það var Mikkel sem sagði mér að það væri rafmagnslaust í allri borginni. Hmm, þá voru góð ráð dýr. Hvað er hægt að gera sem krefst ekki rafmagns (annað en að sofa)? Ég gat ekki haldið áfram með ritgerðina mína af því að tölvurnar virkuðu ekki. Ég gat ekki fengið mér að borða af því ég átti ekkert til og það var ekki hægt að versla því kassarnir eru orðnir svo tæknilegir nú á dögum með strikamerkis-skanna og ég veit ekki hvað og hvað. Ég gat ekki horft á sjónvarpið eða hlustað á útvarpið. En hins vegar gat ég farið út í göngutúr með Míó litla, og það gerði ég. Við fórum í langan göngutúr og enduðum úti í garði þar sem ég þjálfaði hann í cirkús kúnstum, hoppa í gegn um húlla hop hring, fara zik zak milli fótanna á mér ofl. Þegar göngutúrnum var lokið var rafmagnið komið aftur á (í Frederiksberg þar sem ég á heima) og allt var komið í sama horf og venjulega. En það voru víst ekki allir jafn heppnir og ég.

Símon er orðinn hress og sprækur og er loksins farinn að fljúga aftur. Reyndar með nokkrum nauðlendingum af og til, m.a. einu sinni í vatnsskálinni hans Míó. Eða kannski var það viljandi, öll viljum við fara í bað öðru hvoru.

Ég vil benda á nýju heimasíðuna hennar Guðrúnar vinkonu minnar. Hún er nefnilega flutt til Frakklands til að læra og njóta lífsins.
-